Водич за пациентите  и  оние  кои  се  грижат за  нив

Можеби пред  само  еден  миг  дознавте  дека  имате  не-ситноклеточен  белодробен  карцином (НСКБК). Или, само што откривте дека вашиот близок има НСКБК.  Несомнено, имате многу прашања. Сакате  да  знаете  какви  третмански  опции  постојат  за  да  можете  вие  или  вашиот  близок  да  имате  најдобар  можен  третман. Се прашувате што ви претстои на ова  тешко и  неизвесно  патување.

Брошурата ,,Да  се  живее  со  белодробен  карцином‘‘  е  ваш  водич  во  овој  тежок  период.  Оваа  брошура  ги  открива  третманските  опции  кои  ви  стојат  на  располагање. Во неа се вклучени  основните  информации  за  болеста,  третманските  опции,  што  може  да  очекувате  и  каде  да  добиете  дополнителна  помош. Зборовите  кои  нема  да  ви  бидат  познати,  се  потенцирани  низ  брошурата,  а  нивното  значење  е  објаснето  во  речникот  на  страна 19.

Брошурата  ,,Да  се  живее  со  белодробен  карцином‘‘  нема  за  цел  да  го  замени  медицинскиот  совет  на  вашиот  лекар, медицинска  сестра  и  останатите  здравствени  работници  вклучени  во  третманот  на  вашата  болест. Можеби ќе имате повеќе прашања откако ќе ја прочитате брошурата.  Не се воздржувајте да прашате се што ве интересира.  Не постојат лоши прашања кога се работи за вашето здравје.  Колку  повеќе знаете  за  болеста  и  третманските  опции, дотолку  повеќе ќе чувствувате  дека  имате  контрола  врз  болеста,  ќе  имате  активен  пристап  во  лекувањето  и ќе  бидете  посигурни  во  себе. Се  во  овој  тежок период треба  да  биде  за  вас  и  вашето  здравје. Лекарскиот  тим  кој  се  грижи  за  вашето  здравје,  вашата  фамилија  и пријателите  се  тука  за  да  ви  помогнат.

Што треба да очекувате?

Луѓето реагираат  на  различен  начин  кога  ќе  дознаат  дека  имаат  белодробен  карцином.  Некои  вообичаени  емоции  се: страв, гнев,  вина,  анксиозност,  депресија,  осаменост,  безнадежност  и  тага. Разберете  дека  вашите  емоции  ќе  се  менуваат,  некои  денови ќе  бидете  многу  позитивни  и  расположени,  а  во  други  денови ќе бидете  тажни  и  нерасположени.  Понекогаш ќе бидете  исплашени  за  иднината  и ќе чувствувате  бес  зашто  ова  ви  се случува  токму на  вас. Сите  овие  реакции  се  нормални . Лекарите  и  медицинските сестри  тоа  го  знаат  и  можат да  ги  препознаат  реакциите  и  да  ви  помогнат  полесно  да  го пребродите овој период.

Во  овој период  веднаш  после  дијагнозата,  информациите  околу  болеста  и  лекувањето,  може  да бидат  од  голема  помош. Преку нив ќе осознаете  што  треба  да  очекувате  и ќе  се намалат  неизвесноста  и  напнатоста. Тргнете  настрана  се  што  не  е  итно,  фокусирајте  се  на  вашето  лекување и на периодот  кој  ви  следи.

Треба  да  научите  да  се  справите  со  вашата  дијагноза.  Не  се  чувствувајте  виновни  дека  сами  сте  си  ја  предизвикале  болеста.  Поврзаноста  на  белодробниот  карцином  со пушењето  може  да  го зголеми  ова  чувство,  особено  кај пушачите. Загриженоста  што другите  ќе речат може  да  ве  доведе  во  изолација.  Поделете  ги  чувствата  и  мислите  со другите,  така  полесно ќе  се  справите  со  чувствата  на  вина, изолација  и  осаменост. Многумина  овој период  го  споредуваат  со  некое  патување.  Не  мора  да  бидете  сами  на  тоа  патување.  Можеби  сакате  да  дознаете  многу  информации  за  белодробниот  карцином или  не  сакате  воопшто  да  слушате  за  болеста. Двете  реакции  се  сосема  нормални.