Иако  е  можно  сексуалната  активност  да  ви  е  намалена  или  целосно  прекината, после  и  за  време  на  терапијата, важно  е  да  се  обидете  да  сочувате  еден  дел  на  телесен  контакт  со  вашиот  партнер.  Може  да  немате  желба  да  водите  љубов,  но  може  да  ви  се  допаѓа  да  го  држите  за  рака,  да  се  прегрнувате,  да  се  бакнувате  или  да  одберете  свои  начини  за  зближување, како  на  пример масажа. Кога  ќе  почувствувате  дека  сте  подготвени  да  го  зголемите   нивото  на  сексуалната  активност,  можеби ќе посакате да  одделите  извесно  време  за  себе  и  партнерот  без  потешкотии и одвлекување  на  вниманието.

Начинот, на  кој комуницирате  во  тој  конкретен  период,  е  многу  важен. И  двајцата  треба  да имате можност да  зборувате  за  тоа  како  се  чувствувате. Веројатно  нема  да  е  веднаш  лесно  да  зборувате  за  секс  и  можеби ќе  ви  е  полесно  да  зборувате  некаде,  каде  и  двајцата  ќе  се чувствувате  удобно,  можеби  не  во  спалната.

Грижите  за  одразувањето  на  ракот  на  дојката  врз  вашиот  сексуален  живот  ќе  бидат индивидуални  за  вас  и  вашата  ситуација.  Можеби ќе  чувствувате  дека  сте  загубиле  малку од  вашата женственост  и  самопочитта  кон  сопствениот  изглед. Може  уште  да  чувствувате  непријатност  за  првиот  сексуален  обид по  дијагнозата  или  да  се  грижите  дека  нештата  нема  да  бидат  како  претходно.

Исто  така,  ако  не  сте  влегле  во  менопауза после  дијагнозата  може  да  ве  загрижува  фактот  дека  ќе  треба  да  откриете  нов  начин  за  контрацепција,  или  да  стравувате  од  забременување. Сите  тие  грижи  се  природни  и  очекувани. Веројатно  ќе  имате потреба  од  одреден  период  додека  повторно  ви  се  врати  самодовербата  и да  се  чувствувате  слободно  да  имате  повторно  сексуални  контакти.

„Се  обидовме  да  зборуваме  за  причините  поради  кои  некои  нешта  не  беа  како  претходно. Понекогаш  чувствував  дека  не  сакам  да се  обрнува  внимание  на  моите  гради.  Сопругот  од  своја  страна  се  обидуваше  да  се  однесува  како  ништо  да  не  се  случило  и  да  не  се  променило. Во  почетокот  ми  беше  многу  тешко  да  ја прифатам  неговата незагриженост  од  ситуацијата, но подоцна  разбрав,  дека  тоа  е  неговиот  начин  да  се  справи  со  стресот  од  мојот  рак“.

Нина